राव, इथे चक्क प्रेताबरोबर पार्टी केली जाते...वाचा या अनोख्या प्रथे बद्दल !!!

मादागास्करमधल्या ‘मालागासी’ समुदायाचे लोक ‘फामादिहाना’ नावाचा उत्सव करतात. याला “टर्निंग ऑफ दी बोन्स” म्हणतात. या प्रथेप्रमाणं २ किंवा ७ वर्षांनी आपल्या जवळच्या मृत व्यक्तीचं प्रेत कबरीमधून बाहेर काढलं जातं.

स्रोत

अशावेळी दुःख न करता हे लोक उलट त्याची मिरवणूक काढतात आणि त्याच बरोबर पार्टी, नाचगाण्यात मश्गुल होतात. आपण असं म्हणू शकतो की, हा एक प्रकारे संपूर्ण कुटुंबाला एकत्र आणण्याचा उत्सव असतो. संपूर्ण कुटुंब कितीही लांब असलं तरी यावेळी एकत्र येतं. यानिमित्ताने कुटुंबातील लोक एकाच प्रकारचे कपडे घालतात. 

मृत व्यक्तीला पुन्हा एकदा आयुष्य जगता यावं म्हणून ही प्रथा पाळली जाते. मालागासी लोकांच्या म्हणण्याप्रमाणं जोपर्यंत माणसाच्या शरीराचं पूर्णपणे विघटन होत नाही, तोपर्यंत ती व्यक्ती या जगातून बाहेर पडत नाही. त्यामुळे मेल्यानंतरही जोपर्यंत त्याचं शरीर सुस्थितीत आहे तोवर त्याला आयुष्याची मजा घेऊ द्या!! मृत्यूकडे दुखवटा म्हणून न बघता हे लोक उत्सव म्हणून बघतात.

उत्सवानंतर प्रेत अत्तर शिंपडून रेशमी कपड्यात गुंडाळून कायमचं थडग्यात पुरलं जातं. यावेळी मृताबरोबर  दारू, पैसे वगैरेंसारख्या त्याच्या आवडीच्या गोष्टी पुरल्या जातात.
मंडळी, या पार्टीमध्ये मोठ्या प्रमाणावर खर्चही  होतो. त्यामुळं आज ही प्रथा काहीशी नष्ट होण्याच्या मार्गावर आहे.. आणि हे प्रत्येकालाच परवडणारं नाही. त्याचबरोबर ख्रिश्चन समाज याला विरोध करत आहे.

पण आहे ना मृत्यूसुद्धा साजरा करणारी आणि त्यासोबत कुटुंबाला बांधून ठेवणारी वेगळीच प्रथा ??

(सदर लेख अथवा लेखातील कुठल्याही भागाचे छापील, इलेक्ट्रॉनिक माध्यमात परवानगीशिवाय पुनर्मुद्रण करण्यास सक्त मनाई आहे. याचे उल्लंघन करणाऱ्यांवर कायदेशीर कारवाई करण्यात येईल.) 
©बोभाटा