बघा हिमांशू रॉय यांनी पार पडलेल्या महत्वाच्या कामगिऱ्या

२०१२ साली आझाद मैदानात झालेल्या हिंसाचाराचा तपास हिमांशू रॉय यांनी लावला होता. यातील मुख्य आरोपींना पकडण्यात त्यांचा मोठा सहभाग होता.

हिमांशू रॉय यांच्या कारकिर्दीतील ही एक महत्वाची केस होती. शक्ती मिल बलात्कार प्रकरणातील मुख्य आरोपींना त्यांनीच फासापर्यंत नेलं होतं.

२०१२ सालच्या अभिनेत्री मीनाक्षी थापा हिच्या खून प्रकरणाचा तपास रॉय यांच्या हाती सोपवण्यात आला होता. अमित कुमार जयस्वाल आणि प्रीती सुरीन या मीनाक्षीच्या मारेकऱ्यांच्या मुसक्या आवळण्याचं काम त्यांनीच केलं होतं.

पल्लवी पुरकायस्थ हत्या प्रकरण हे किचकट होऊन बसलं होतं. त्याला योग्य रित्या हाताळण्याचं काम हिमांशू रॉय यांनी केलं. त्यांच्या प्रयत्नातूनच मुख्य आरोपी असलेल्या वॉचमन सज्जाद पठानला जेरबंद झाला.

लैला खान या पाकिस्तानी अभिनेत्रीच्या हत्येच्या तपासात हिमांशू रॉय यांनी थेट काश्मीर गाठलं होतं. शेवटी खुनातला मुख्य सूत्रधार असलेला लैला खानचा पती त्यांच्या हाती लागला.

आयपीएलच्या स्पॉट फिक्सिंगच्या प्रकरणातील अनेक मातब्बर मंडळींना उघड्यावर आणण्याचं काम हिमांशू रॉय यांनी केलं होतं. याच केस नंतर श्रीसंत, अजित चंदीला, अंकित चव्हाण यांचे क्रिकेट करियर संपुष्टात आले होते. 

छोटा राजन आज जेरबंद आहे ते हिमांशू रॉय यांच्यामुळे. जे डे हत्याप्रकरणासारखी अवघड कामगिरी त्यांनी फत्ते करून दाखवली होती. कोणताही पुरावा नसताना त्यांनी काही धागेदोरे वापरून या केसचा छडा लावला होता. 

कसाब सारख्या दहशतवाद्याला सुरक्षित व गुप्तरीत्या आर्थर रोड जेलमधून येरवडा कारागृहापर्यंत नेण्याचं काम हिमांशू रॉय यांनी करून दाखवलं होतं. याच येरवडा जेल मध्ये कसाबला फाशी देण्यात आली होती. एकप्रकारे कसाबला फाशी पर्यंत पोचवण्याचं काम रॉय यांनी पार पडलं होतं.

मंडळी, महाराष्ट्राच्या मातीतील या धडाकेबाज पोलीस ऑफिसरला बोभाटाचा सलाम !!