अमेरिकेच्या या राज्यात लस घेणाऱ्या व्यक्तीला लॉटरी लागत आहे...काय आहे ही स्कीम?

यासाठी पहिले बक्षीस तब्बल दहा लाख डॉलरचे ठेवण्यात आले होते. भारतीय चलनाप्रमाणे ७ कोटींपेक्षा जास्त रकमेचे हे बक्षिस आहे. साहजिक लस घेऊन बक्षिस मिळणार असेल तर कोण यात सहभागी नाही होणार पहिल्याच फेरीत २७ लाख लोकांनी या मोहिमेसाठी अर्ज केला.

नुकतेच या लॉटरीतील विजेत्यांची घोषणा गव्हर्नर माईक डेवेन यांनी केली. ऍबीगेल बुगेन्स्क या २२ वर्षीय महिलेचे मात्र एका लसीने नशीब पालटून टाकले. या लॉटरीची ती विजेती ठरली असून तिला तब्बल ७ कोटीपेक्षा अधिक रक्कम मिळणार आहे. 

विशेष गोष्ट म्हणजे १२ ते १७ वर्षांच्या मुलांसाठी विशेष स्कॉलरशिपची घोषणा देखील करण्यात आली होती. लसीकरण मोहिमेत सहभागी झालेल्या मुलांपैकी जो विजेता होईल त्याला ट्युशन, रूम आणि बोर्ड, पुस्तके अशा गोष्टी मोफत मिळणार आहेत. जोसेफ कास्टलो नावाच्या मुलाने या स्कॉलरशिप मध्ये बाजी मारली.

(जोसेफ कास्टलो आणि त्याचं कुटुंब)

यातही अजून एक महत्त्वाची गोष्ट म्हणजे दर बुधवारी असे विजेते काढले जाणार आहेत. दर आठवड्याला एकाला लॉटरी लागेल आणि त्याचे आयुष्य बदलेल. आहे ना भन्नाट गोष्ट? ओहायोचे गव्हर्नर सांगतात की, 'आमच्याकडे पैसे जास्त झाले अशातला भाग नाही, पण कोरोना संकट कमी करायचे असेल तर लोकांची उदासीनता कमी करणे भाग होते.'

एकीकडे लोक भारतात फक्त लस मिळाली तरी खूप झाले या अपेक्षेने लशीची वाट पाहत आहेत, तर दुसरीकडे अमेरिकेत मात्र लस घेण्याच्या बदल्यात बंपर बक्षिसे मिळत आहेत. यालाच म्हणतात एक सुपात असणे आणि दुसरा तुपात असणे.