आयसीसी टी -२० विश्वचषक २०२२ (Icc T20 World Cup 2022) स्पर्धेचा थरार सुरू व्हायला अवघे काही दिवस शिल्लक राहिले आहेत. ही स्पर्धा सुरू होण्यापूर्वी आयसीसीने या स्पर्धेची बक्षीस रक्कम जाहीर केली आहे. ऑस्ट्रेलियामध्ये पार पडणाऱ्या या स्पर्धेत ५.६ दशलक्ष डॉलर्स बक्षीस म्हणून देण्यात येणार आहे. भारतीय चलनानुसार ही रक्कम ४५.६७ कोटी रुपये आहे. यामध्ये विजेत्या संघाला किती रक्कम मिळणार असा प्रश्न तुम्हालाही पडला असेल. चला तर पाहूया. (Prize money for icc T20 world cup 2022)
आयसीसीने जाहीर केले आहे की, आयसीसी टी -२० विश्वचषक स्पर्धेत विजय मिळवणाऱ्या संघाला १.६ दशलक्ष डॉलर्स म्हणजेच १३ कोटी रुपये दिले जाणार आहेत. तर अंतिम सामन्यात पराभूत होणारा संघ देखील खाली हात परतणार नाहीये. उपविजेत्या संघाचा देखील खिसा गरम केला जाणार आहे. उपविजेत्या संघाला ६.५ कोटी रुपये बक्षीस म्हणून दिले जाणार आहेत.
ही स्पर्धा ऑस्ट्रेलियामध्ये पार पडणार आहे. तसेच आयसीसीने घोषणा केली आहे की, उपांत्य फेरीत पराभूत होणाऱ्या संघांना ४ लाख युएस डॉलर्स बक्षीस स्वरूपात दिले जातील. तसेच सुपर -१२ फेरीतून बाहेर होणाऱ्या ८ संघांना प्रत्येकी ७० हजार युएस डॉलर्स बक्षीस स्वरूपात दिले जाणार आहेत.
आयसीसी टी -२० विश्वचषक २०२२ स्पर्धेतील बक्षीस वितरणाची यादी...
विजेता संघ : १.६ दशलक्ष डॉलर्स (जवळपास १३ कोटी रुपये)
उपविजेता संघ: ०.८ दशलक्ष डॉलर्स ( जवळपास ६.५ कोटी रुपये)
उपांत्यफेरीत पराभूत होणारे संघ : ०.४ दशलक्ष डॉलर्स ( जवळपास ३.२६ कोटी रुपये)
सुपर १२ फेरीत प्रत्येक सामना जिंकणाऱ्या संघाला : ४० हजार डॉलर्स ( जवळपास ३३.६२ लाख)
सुपर १२ फेरीतून बाहेर होणाऱ्या संघाला : ७० हजार डॉलर्स ( ५७ लाख रुपये)
पहिल्या फेरीत प्रत्येक सामना जिंकणाऱ्या संघांना : ४० हजार डॉलर्स ( जवळपास ३३.६२ लाख रुपये)
पहिल्या फेरीतून बाहेर होणाऱ्या संघांना : ४० हजार डॉलर्स ( जवळपास ३३.६२ लाख)
आयसीसी टी -२० विश्वचषक २०२२ स्पर्धेची सुरुवात १६ ऑक्टोबर पासून होणार आहे. पहिल्या फेरीत वेस्ट इंडिज,श्रीलंका सह ८ संघ आमने सामने येणार आहेत. यापैकी ४ संघ सुपर -१२ फेरीत प्रवेश करतील. सुपर -१२ फेरीतील सामने २२ ऑक्टोबर पासून सुरू होणार आहेत. तर भारतीय संघाचा पहिला सामना २३ ऑक्टोबर रोजी कट्टर प्रतिस्पर्धी पाकिस्तान संघाविरुद्ध पार पडणार आहे.