तुमचा आनंद कशात आहे हे तुम्ही सांगू शकता? शॉपिंग, मित्र मैत्रिणींच्या भेटीगाठी, आरामात लोळत पडणे, हॉटेलिंग, पिकनिक, टीव्ही सिनेमा, की अजून काही? कोण कशात सुख मानेल ही खरेतर व्यक्तीसापेक्ष गोष्ट. पण आपला शेजारी देश भूतान मात्र खरा सुखी देश मानला जातो. आणि याला कारण आहे ती तेथील लोकांची मनोवृत्ती, त्यांचा सकारात्मक दृष्टिकोन.
भूतान हा हिमालयाच्या कुशीत वसलेला छोटासा देश. हा देश आपल्या प्रगतीचे मोजमाप करताना देशाचे उत्पन्न किंवा भौतिक गोष्टींचे मोजमाप यांचा आधार घेत नाही, तर देशातील लोक किती आनंदी आहेत हे दाखवणाऱ्या ग्रॉस नॅशनल हॅपिनेस इंडेक्स या निर्देशांकाचा आधार घेतो. एखाद्या देशातील सर्वसामान्य लोक किती सुखी, आनंदी आहेत, मानसिकदृष्ट्या किती स्वस्थ आहेत हे मोजण्याचे हे एक प्रमाण आहे.
या सुखाच्या, आनंदाच्या शोधावर भाष्य करणारा एक सिनेमा यावर्षीच्या ९४व्या ऑस्कर पुरस्कारांसाठी भूतानने पाठवला आहे. या सिनेमाला सर्वोत्कृष्ट आंतरराष्ट्रीय चित्रपटाच्या कॅटेगरीत नामांकन मिळाले आहे. सिनेमाचे नाव आहे : 'लुनाना- अ याक इन द क्लासरूम'
