केसातल्या कोंड्याचा त्रास सगळ्यांना का होत नाही असा प्रश्न पडलाय? उत्तर इथं आहे!!

कोंडा म्हणजे डोक्यावरील केसांमध्ये आढळणारे खपल्यांसारखे दिसणारे पांढऱ्या रंगाचे त्वचेचे सूक्ष्मकण. ते अनेकदा मान, खांदा ह्या ठिकाणीही दिसतात. कोंडा खूप हानिकारक नसला तरी त्यामुळे खाज सुटते. त्यामुळे त्या व्यक्तीला बाहेर, समाजात वावरताना अनेकदा कान'कोंडं' वाटू शकतं.

सामान्यतः कोंडा होण्यास मालासेझिया नावाची यीस्टसारखी बुरशी कारणीभूत असते. ही बुरशी कोणत्याही कारणाशिवाय निरोगी लोकांच्या डोक्याच्या त्वचेवर आढळते.
- स्ट्रेस असणाऱ्या व्यक्ती, आजारी व्यक्तींंना कोंड्याचा त्रास जास्त होतो असं काही तज्ञ म्हणतात.
- थंड हवा, डोक्यावरची कोरडी त्वचा हेदेखील कोंड्यासाठी कारणीभूत ठरतात.
- कोंडा होण्याचं अजून एक महत्त्वाचं कारण म्हणजे सिबोऱ्हीक डर्मेटायटिस (seborrheic dermatitis) हा विकार. ह्या विकारात डोक्याची त्वचा लाल होते, त्यावर खवल्यांसारखे चट्टे (scaly patches) उमटतात.

- केस अतिरिक्त प्रमाणात तेलकट किंवा कोरडे असतील किंवा हेअर प्रॉडक्ट्सप्रती संवेदनशील असतील, तरी कोंड्याची समस्या उद्भवते.

यामागे अनेक कारणं आहेत.
- तरुण आणि मध्यमवयीन व्यक्तींमध्ये कोंडा जास्त प्रमाणात होतो. वृद्ध लोकांमध्ये हे प्रमाण कमी असतं.
- पुरुषांमध्ये कोंडा होण्याचं प्रमाण स्त्रियांपेक्षा जास्त असतं.
- पार्कीन्सन्स, क्वचित प्रसंगी एचआयव्ही यांसारखे विकार असणाऱ्या लोकांना ही समस्या निर्माण होण्याची शक्यता जास्त असते.
- केस मुळात तेलकट असतील तर कोंडा जास्त असतो. कोरडे केस असलेल्यांनीही वारंवार शॅम्पू केल्यास कोंड्याचा त्रास होतो.

कोंडा कमी करण्यासाठी अँटिडँड्रफ शाम्पू वापरतात. याशिवाय कोरफड, लिंबाचा रस, बेकींग सोडा, ऍस्पिरिन आणि शाम्पू यांचं मिश्रण या घरगुती उपायांनीदेखील कोंड्याचं प्रमाण कमी होतं.

स्मिता जोगळेकर