मारिझिओ गुची : या दुर्दैवी राजकुमाराची शोकांतिका वाचून कोणाचेही मन हळहळेल !

मारिझिओ एका पार्टीत गेला असता त्याची ओळख पॅट्रिझिया रेगियानी हिच्याशी झाली. पहिल्या नजरेतच तो तिच्या प्रेमात पडला होता. त्याचे वडील रोडोल्फो यांना मात्र हे नाते पसंत नव्हते. पॅट्रिझिया ही फक्त पैसाच्या मागे पळणारी मुलगी आहे. पैसा, प्रसिद्धी आणि यश याशिवाय तिला काहीही जवळचं नाही, तिच्याशी लग्न करून तुला नंतर पश्चाताप झाल्याशिवाय राहणार नाही हे त्यांनी मारिझिओला अनेकदा समजावून सांगितले. पण मारिझिओला जणू विषाची परीक्षा घ्यायचीच होती.

वडिलांचा विरोध न जुमानता १९७२ मध्ये त्याने पॅट्रिझियाशी लग्न केले. सुरुवातीचे काही दिवस तरी स्वर्गसुखाचे होते. मारिझिओशी लग्न केल्यानंतर पॅट्रिझिया पैशाच्या राशीत लोळू लागली होती. तरीही तिची खरी अभिलाषा अजून कुठे पूर्ण झाली होती. हळूहळू मारिझिओला तिचे खरे रूप कळू लागले. आपले वडील खरे बोलत होते याचा त्याला प्रत्यय येऊ लागला. पॅट्रिझियाने मारिझिओच्या प्रेमाचा गैरफायदा घेत रोडोल्फो आणि त्याच्यात दरी निर्माण केली. त्याच्यासाठी हे नाते म्हणजे नुसताच पैशामागे धावायला लावणारी एक शर्यत बनली. मारिझिओने गुची हाऊसचा संपूर्ण ताबा स्वतःकडे घ्यावा यासाठी पॅट्रिझियाचे सारखे टोमणे सुरू झाले.

काका अल्डोशी कोर्टकचेऱ्या करून मारिझिओने कसाबसा गुचीचा संपूर्ण ताबा आपल्याकडे घेतला. पण एवढ्यानेही पॅट्रिझियाचे काही समाधान झाले नाही. तिला मारिझिओचा कुठलाच निर्णय पटत नसे. गुचीची संपूर्ण मालकी मारिझिओकडे आली असली तरी तो ज्याप्रकारे बिझनेस सांभाळत आहे हे पाहून लवकरच तो कंपनीचे दिवाळे काढेल असे पॅट्रिझियाचे म्हणणे होते. पॅट्रिझियाचे टोमणे ऐकून ऐकून की काय माहीत नाही, पण मारिझिओ जास्तीत जास्त काळ घरापासून दूर राहू लागला. अशाच काळात त्यांना दोन मुलीही झाल्या.

पॅट्रिझिया ही मारिझिओची प्रमुख सल्लागार होती. कंपनीच्या निर्णयातही तिच्या सल्ल्याशिवाय पान हलत नसे. तरीही ती समाधानी नव्हती. तिला कंपनीचा ताबा स्वतःकडे हवा होता. तिच्या अशा वागण्याने मारिझिओ तिच्यापासून दूर जाऊ लागला. कंपनीच्या बाबतीतीही त्याने तिचे सल्ले ऐकणे बंद केले. याच काळात त्याची ओळख फ्रांचीशी झाली आणि त्याने पॅट्रिझियाशी घटस्फोट घेण्याचा निर्णय घेतला.

दरम्यान त्याने बेहरेनमध्ये एक बँक सुरू करण्याचाही घाट घातला होता आणि यासाठी त्याने १३.५ कोटी डॉलर्स जमवले होते. याच दरम्यान गुचीचे चेअरमनपद त्याच्याकडे आले. परंतु त्याला काही ते समर्थपणे चालवता आले नाही. १९९१ ते १९९३ दरम्यान ही कंपनी खूपच तोट्यात आली.

दुर्दैवाने पॅट्रिझियाचा अंदाज खरा ठरू लागला होता. पण मारिझिओला त्याची अजिबात फिकीर नव्हती. तो तर पॅट्रिझियाला घटस्फोट देण्याच्या तयारीला लागला होता. पॅट्रिझियाच्या तुलनेत फ्रांची त्याला समजून घेत असे. त्याच्या निर्णयात ती कधी ढवळाढवळ करत नसे की, त्याला तो कसा नालायक आहे हे ऐकवत नसे. म्हणूनच आता त्याला फ्रांची सोबत रीतसर लग्न करून आपले नवे आयुष्य सुरु करायचे होते.

१९९४ साली पॅट्रिझिया आणि मारिझिओच्या घटस्फोटाची प्रक्रियाही पूर्ण झाली होती. पॅट्रिझियाला वार्षिक १० लाख डॉलरची पोटगी मांजर झाली होती. परंतु पॅट्रिझियाला हे मंजूर नव्हते. एखाद्या पोरीने आपली जागा घ्यावी आणि तिच्या नाकावर टिच्चून गुची साम्राज्याची राणी व्हावे हे तर तिला कधीही खपले नसते.

तिने आपल्याच नवऱ्याला मारण्याची सुपारी देण्याचे ठरवले. घटस्फोट हे तर कारण होतेच, पण त्याने गुचीवरील आपला हक्क सोडून दिला होता. त्याच्या वाटणीचे सगळे शेअर्स विकून टाकले होते. कुटुंबाचा वारसा धुळीला मिळवला होता, तो एक अपयशी व्यावसायिक असल्याचे त्याने सिद्ध करून दाखवले होते. इतके सगळे असूनही तो तिला सोडून जात होता. याच रागातून तिने हे काम करवून घेतले. २७ मार्च १९९५ रोजी तिने ठरवलेल्या मारेकऱ्याने आपले काम फत्ते केले. त्या दिवशी सकाळी ८.३० वा मारिझिओ आपल्या ऑफिसच्या पायऱ्या चढून वर पोहोचला. त्याच्या केबिनचा दरवाजा उघडून तो आत जाणार इतक्यात पाठीमागून कुणीतरी त्याच्यावर तीन गोळ्या झाडल्या. त्याने पाठ फिरवताच शेवटची गोळी झाडली गेली जी थेट त्याच्या मस्तकात घुसली आणि एका विशाल साम्राज्याचा अपयशी राजकुमार क्षणार्धात कोसळला.

दोन वर्षे तरी त्याच्या मारेकऱ्यांबाबत पोलिसांना काही सुगावा लागला नाही. अर्थात पोलिसांना पॅट्रिझियावरच संशय होता, पण तिच्या विरोधात काही सबळ पुरावा पोलिसांच्या हाती लागत नव्हता. मग त्याचे इतर नातेवाईक, व्यवसायातील प्रतिस्पर्धी सगळ्यांवर नजर रोखून झाली तरी पोलिसांच्या हाती काहीच लागले नाही. दोन वर्षांनी अचानक एकेदिवशी पोलिसांना एक निनावी फोन आला आणि त्याने फक्त गुची हा एकच शब्द उच्चारला. त्या खबऱ्याला शोधत पोलीस त्याच्या पत्त्यावर पोहोचले आणि त्याने गुचीचा मारेकरी गुजीपीन ऑडीएमाला पोलिसांच्या हवाली केले.

पिनाला ताब्यात घेतल्यानंतर पोलिसांना खरा सूत्रधार शोधण्यास वेळ लागला नाही आणि अशापद्धतीने पॅट्रिझिया रेगीयानी अलगदपणे पोलिसांच्या तावडीत सापडली. या मारेकऱ्याला तिने ३,६५,००० डॉलरची सुपारी दिली होती. हेही नंतर तिचे फोन रेकॉर्ड तपासल्यावर कळाले.१९९८ साली हा खटला पुन्हा सुरू झाला आणि पाचच महिन्यातच याचा निकाल देखील लागला. पॅट्रिझियाला २९ वर्षांचा तुरुंगवास सुनावण्यात आला तर, पेनीला २५ वर्षाचा. ४ नोव्हेंबर १९९८ रोजी हा निकाल देण्यात आला. पॅट्रिझिया २०१४ साली तुरुंगवास संपवून बाहेर आली.

मारिझिओ गुचीला आयुष्यभर कसलीच तसदी घ्यावी लागली नाही. हे खरं असलं तरी त्याला स्वतःला सिद्ध करता आलं नाही हेही खरं. वडिलांचा सल्ला ऐकून त्याने पॅट्रिझियाशी लग्न करणे टाळले असते तरी आज या फॅशन आयकॉनचा इतिहास काही वेगळा ठरला असता.

मेघश्री श्रेष्ठी