ज्याकाळी डॉक्टर म्हणजे फक्त पुरुषच असायचे, त्याकाळी मानसोपचारतज्ज्ञ बनून एका महिलेने भारताच्या इतिहासात आपले नाव नोंदवले. त्यांचे नाव शारदा मेनन. त्या देशातील पहिल्या महिला मानसोपचारतज्ज्ञ होत्या. नुकतेच त्यांचे चेन्नई येथे वयाच्या ९८ वर्षी निधन झाले. आज आपण त्यांच्या कार्याविषयी जाणून घेणार आहोत.
मेनन यांचा जन्म एका मल्याळी कुटुंबात 5 एप्रिल 1923 रोजी कर्नाटक राज्यातील मंगळूर येथे झाला. मेनन या आठ भावंडांपैकी सर्वात धाकट्या होत्या. त्यांचे वडील न्यायाधीश होते. नंतर त्यांची चेन्नई येथे बदली झाली. शारदा यांचे प्रार्थमिक शालेय शिक्षण गुड शेफर्ड स्कूलमध्ये झाले. लहानपणापासूनच त्यांना अभ्यासाची आवड होती. शिकून खूप मोठे कोणीतरी व्हायचे हे त्यांचे स्वप्न होते. नंतर क्राइस्ट चर्च अँग्लो-इंडियन मध्ये उच्च माध्यमिक शिक्षण घेऊन त्यांनी मद्रास मेडिकल कॉलेजमधून पदवी घेतली.
बेंगळुरूमधील नॅशनल इन्स्टिट्यूट ऑफ मेंटल हेल्थ अँड न्यूरो सायन्सेस येथे त्यांनी मानसोपचार शास्त्रातील दोन वर्षांचा डिप्लोमा यशस्वीपणे पूर्ण केला.
