ही गोष्ट आहे ट्रेव्हर मिल्टन नावाच्या एका अवलियाची. याने केवळ कागदावर एक संकल्पना मांडून लोकांना उल्लू बनवलं आणि ती प्रत्यक्षात न आणताही अफाट पैसा कमावला.
इंधनासाठी हायड्रोजनचा वापर केलेल्या आणि शून्य उत्सर्जन (झिरो एमिशन) असलेल्या ट्रकची निर्मिती करत असल्याचा त्याचा दावा होता. पर्यावरणपूरक हा शब्दच मोठा जादुई आहे. भले भले घोळात घेता येतात. तसंच काहीसं या ट्रेव्हर मिल्टनने केलं होतं. हा ट्रक पर्यावरण आणि पैसा दोन्ही वाचवू शकतो असा त्याचा दावा होता.
या निकोला वन नावाच्या ट्रकमुळे वाहतूक उद्योगात अभूतपूर्व क्रांती घडून येणार होती आणि अर्थातच ट्रेव्हरच्या आयुष्यातही. तो कोट्याधीश बनणार होता. बॉश, जनरल मोटर्स यासारख्या बलाढ्य कंपन्यांना ट्रेव्हरबरोबर काम करायचं होतं. या कंपनीचं मूल्य ३४ बिलियन डॉलर्स असल्याची थाप ट्रेव्हरने बिनदिक्कत मारली होती.
