सोमवार दिनांक ८ ऑगस्ट रोजी भारताचा सहभाग: आज सगळे लक्ष 'अभिनव बिंद्रा' नि 'गगन नारंग'कडे

महिलांच्या वैयक्तिक स्पर्धांना सुरूवात होईल. दीपिका कुमारीचा २०, बोम्बायला २४ तर लक्ष्मीराणीचा ४३वा क्रमांक आहे. आता दोन दोन स्पर्धकांचे समोरासमोर असे नॉक आउट पद्धतीने सामने होतील. हा भा.प्र.वे.नुसार संध्याकाळी ६:०९पासून या सामन्यात वेगवेगळ्या वेळी भारतीयांचे प्रतिनिधित्त्व बघता येईल. जे खेळाडू हे सामने जिंकतील त्यांना पुढील सामने गुरूवारी आहेत.

संध्याकाळी ५:३०: संध्याकाळी पुरुष १०मी एअर रायफल स्पर्धेला सुरूवात होईल. सोमवारी याची क्वालिफिकेशन म्हणजे पात्रता फेरीपासून अंतिम फेरीपर्यंत सर्व फेर्‍या होतील. यात भारतातर्फे अनुभवी व ऑलिंपिक ब्रॉन्झपदक विजेता गगन नारंग व सुर्वणपदक विजेता अभिनव बिंद्रा दोघेही सहभागी असतील. 

त्याचबरोबर संध्याकाळी ६ वाजता पुरुष 'ट्रॅप' स्पर्धेला सुरूवात होईल. याच्गी आज क्वालिफिकेशन म्हणजे पात्रता फेरीची दुसरी राउंड असेल. यात भारतातर्फे ज्ञान चेनई आणि मानवजीत संधु सहभागी होतील.

संध्याकाळी ७:३० वाजता पुरुष हॉकीमध्ये भारतीय संघ बलाढ्य जर्मनीला भिडेल.

तर रात्री २:३० वाजता महिला हॉकीमध्ये भारत विरुद्ध ब्रिटन आमनेसामने असतील.

२०० मी महिला फ्रीस्टाईल स्पर्धांना आज सुरूवात होईल. रात्री ९:३२ वाजता भारताची शिवानी कटारीया पहिल्याच हिटमध्ये खेळताना दिसेल.

तर पुरुष २००मी बटरफ्लाय स्पर्धांनाही आज सुरूवात होईल व रात्री १०:०४ वाजता त्याच्याही पहिल्याच हिटमध्ये भारताचा साजन प्रकाश सहभागी असेल.

(साधारणत: पहिला हिट हा तुलनेने कमी रँकच्या खेळाडूंचा असतो)

आज ज्या स्पर्धांमध्ये पदके प्रदान होणार आहेत त्यापैकी शूटिंगमध्ये भारताचा जोरदार सहभाग आहे. यात अभिनव बिंद्रा आणि गगन नारंग असे दोन तगडे खेळाडू सहभागी असणार आहेत. या दोघांपैकी एकाकडून आपण पदकाची अपेक्षा नक्कीच करूयात. आणि नशीब जोरावर असले तर दोघेही पदक मिळवू शकतात इतके अनुभवी व सक्षम ते नक्कीच आहेत. रात्री ८:३० वाजता या स्पर्धेची अंतिम फेरी आहे. त्यात भारताचा सहभाग असेल तर आजचा प्राईम टाईल ही स्पर्धा खाईल हे नक्की :)

ट्रॅप स्पर्धेत पहिल्या फेरी अखेर मानवजीतचा रँक १७ आहे. जर दुसर्‍या फेरीत तो अधिक चांगला खेळला तर सेमी फायनल पर्यंत पोचू शकेल मात्र त्याच्याकडून पदकाची अपेक्षा करणे चुकीचे ठरेल.