या मोसमात कोणत्या प्रकारची छत्री वापरणार?

नेहमीची दोन किंवा तीन फोल्डची छत्री जुनी झाली. आता जमाना आहे पाच घड्या होणार्‍या नॅनो छत्रीचा. ही छत्री खिशातहे बसेल इतकी लहान आणि वजनाने हलकी आणि उघडल्यावर मोठ्या छत्रीइतकीच होते.

ऑटोमॅटिक स्कूटर कशी बटन दाबून बंद करता येते तशीच ही छत्रीपण बटन दाबलं की बंद होते. विशेषत: रिक्षा किंवा गाडीत बसताना एका हाताने बॅग सांभाळत कशीबशी छत्री बंद करताना नाही म्हटलं तरी भिजायला होतंच. तो त्रास या छत्रीमुळे काहीसा टाळता येण्यासारखा आहे.

हौसेला मोल नसतं. रत्नजडित मुठीची आणि दोन्ही बाजूंनी डिझाईन असलेल्या या छत्रीची किंमत आहे २२,५००रूपये!! हरवली तर मात्र छत्रीही गेली आणि पावसात भिजून कुडकुडायची वेळ येईल.

नेहमीच्या प्रकारात स्कूटरवर मागे बसलेल्याने छत्री पकडून बसावं लागतं. पण तो मार्ग एकट्यानेच गाडी चालवायची असेल तर अवलंबता येत नाही. यावर्षी बाजारात अशा छत्र्या लावलेल्या स्कूटर्स दिसायला सुरूवात झालीय. 

डिझायनर असली तरी ही छत्री २०००रूपयांच्या आत बाहेरच आहे. उन्हात आणि पावसाळ्यात अशा दोन्ही ऋतूंत उपयोगी पडणारी ही छत्री ऑनलाईनदेखील उपलब्ध आहे.

ही ट्रान्सस्परंट छत्री दिसायला मस्तच आहे. पावसात न भिजताही पावसाचा आनंद या छत्रीत घेता येईल. फक्त कुणाला चुकवायचं असेल तर मात्र हिचा काहीएक उपयोग नाही. 

केरळमध्ये वाय-फाय छत्री आल्याची बातमी आहे. ते जरी या छत्रीला वायफाय छत्री म्हणत असले तरी छत्री काही वाय-फाय नाहीय. या छत्रीच्या मुठीत ब्ल्यूटूथ डिव्हाईस आहे , जे आपण आपल्या मोबाईलच्या ब्ल्यूटूथला जोडू शकतो आणि फोन बाहेर न काढताच छत्रीच्या मुठीला असलेल्या बटनाद्वारे फोनकॉल घेऊ शकतो. असं करण्यानं आपला फोन भिजण्यापासून वाचेल, पण आजूबाजूचे लोक आपलं बोलणं ऐकू शकतील हा धोका नक्कीच आहे. 

कारमधून फिरायचं असल्यास छत्री कितीही मोठी असली , तरी वाहून नेणं सोपं पडतं. त्यामुळं कारमधून प्रवास करणार्‍या लोकांना अशा मोठ्या आणि रंगीबेरंगी छत्री पसंत दिसते.

पुरूषांच्या काळ्या छत्र्या सहज चोरीला जातात. उलटपक्षी स्त्रियांच्या आणि रंगीबेरंगी छत्र्या चोरल्या गेल्या तरी त्या लपवणं इतकं सहज शक्य नसतं. आजकाल लांब दांड्याच्या, फुलांची नक्षी असलेल्या आणि कडेला झालर लावलेल्या छत्र्यांची खूप चलती आहे. या छत्र्या बटनाच्या छत्रीपेक्षा टिकतातही अधिक आणि प्रसंगी स्वसंरक्षणार्थही उपयोगी पडतात.