लहानपणी शाळेत गुरुजींच्या हातात आपण खडू पाहायचो, कधी कधी आपणही तो वापरायचो. पण याच खडूला कोरुन त्याला आगळंवेगळं रूप देणारा एक अवलिया आहे, त्याचं नाव आहे सचिन संघे.
कर्नाटकातील मुदूगेरी या लहान गावातील सचिन लहानपणापासूनच खडूपासून वेगवेगळी शिल्पे बनवतो. या कलेला त्याने 'चॉकृती' असं नाव दिलंय. यासाठी त्याने कोणतंही शास्त्रीय प्रशिक्षण घेतलेलं नाही. पण खडूमध्ये वेगवेगळी शिल्पे, थीम्स तो सुईच्या साहाय्याने लीलया साकारतो.
सचिनला खडूपासुन एक सूक्ष्म शिल्प बनवण्यासाठी 4 ते 8 तास लागतात.. काहीवेळा ही वेळ 30 ते 80 तासांपर्यंत जाते.
कित्तूर राणी चन्नम्मा, स्टॅच्यू अॉफ लिबर्टी, दुर्गा, हंपीचा रथ ही शिल्पे सर्वात कठीण होती असे सचिन सांगतो. आणि सचिनची बहुतांश शिल्पे पहिल्याच प्रयत्नात पूर्ण होतात.
या कलेने सचिनला देशभर प्रसिद्धी तर मिळालीच पण त्याचे सचिन तेंडुलकरला भेटण्याचे स्वप्नही पुर्ण झाले. सचिन तेंडुलकर, अमिताभ बच्चन यासारखे दिग्गज सचिन संघेच्या कलेवर फिदा झाले.
आपल्या या छंदाविषयी बोलताना सचिन सांगतो, "इंजिनिअरिंग शिकत असताना अभ्यासातून मला जराही वेळ मिळायचा नाही, पण मला नोकरी मिळाल्यानंतर मी परत हे काम सुरू केलं. मी पहिल्यांदा भगवान महावीरांचे शिल्प खडूत कोरले होते. यातून मला खूप आत्मविश्वास मिळाला आणि मग मी मागे वळून पाहिले नाही, या कामात मला कुटूंब आणि मित्रांकडून खूप छान प्रोत्साहन मिळते, ते मला सतत नविन कल्पना पुरवत असतात."
सचिन सांगतो की, "या कलेसाठी संयम आणि एकाग्रता अतिशय महत्वाची आहे. सुईच्या टोकावरचे प्रेशर, खडूची हाताळणी अशा गोष्टींवर फक्त सरावाने प्रभुत्व मिळवता येते. यासाठी कोणताही शॉर्टकट नाही. सचिनची शिसपेन्सिल आणि खडू या दोन्ही माध्यमांवर चांगलीच हुकूमत आहे.
इंजिनिअर इंजिनिअरिंग शिकतो, पण पुढे काय-काय करेल हे तर खुद्द देवालाही कदाचित सांगता येणार नाही.
सचिनच्या कलाकृती पाहण्यासाठी तुम्ही त्याच्या या फेसबुक पेजला आणि ट्विटरला भेट देऊ शकता -
www.facebook.com/SachinSangheChalkArt
टीप: या लेखात वापरलेले कलाकृतींचे सर्व फोटोज सचिन संघेंच्या ट्वीटर पेजवरून घेतले आहेत.