पावसाची गाणी : आज ऐकू या अहिराणी भाषेतील टॉप पावसाची गाणी...

हे गाणे अहिराणीच नाही, तर इतर भाषिक लोकांनासुद्धा माहित आहे. २ वर्षापूर्वी हे गाणे पावसाळ्यात आले होते आणि तेव्हाच ते पूर्ण महाराष्ट्रात तुफान हिट झाले होते. आजही या गाण्याची क्रेज कमी झालेली नाही. एक प्रेमभंग झालेला तरुण, ज्याला आम्ही आहिराणीत 'गम मा पडेल' म्हणतो, तो आपल्या सोडून गेलेल्या प्रेयसीसाठी गाणे म्हणतो. 'सावन ना महिना मा तुले प्यार करना ये'! म्हणजे पावसाळ्यातील या रोमँटिक वातावरणात मी तुझ्यावर प्रेम केले. अशी थीम असलेले हे गाणे मात्र पुढे ऐकणाऱ्याच्या मनाचा ठाव घेते राव!! 

गम मा पडेल आमना खान्देश ना पोरे ते गाणं आयकीनीच कानाबाना व्हई गयतात. आणि अगदी तीच फिलिंग हे गाणे ऐकल्यावर तुम्हाला पण येईल याची खात्री आहे.

लोकगीते हे खऱ्या अर्थाने स्थानिक जनजीवनाचा आरसा असतात. आजूबाजूला घडणाऱ्या गोष्टींचे त्यात प्रतिबिंब दिसते. हेच पाहा ना, खेड्यातला तरुण आपल्या प्रेयसीसाठी एखाद्या मॉलमधून नाहीतर यात्रेतून गिफ्ट आणतो. म्हणूनच 'धरणगाव ना बजार मा तुले चुडी लयना ये' असे तो म्हणतो.

सध्या अमिताभ बच्चनच्या "शावा शावा'  गाण्यावर एडिट केलेले धोंड्या धोंड्या पाणी दे गाणे खूप गाजत आहे. खरेतर हे एक खान्देशी लोकगीत आहे. सध्या ते डिजे रिमिक्स वगैरे होऊन वायरल होत आहे. धोंड्या धोंड्या पाणी दे म्हणजे देवाला पाऊस पाडण्यासाठी घातलेली साद आहे. खान्देशात जेव्हा जून उलटूनही पाऊस पडत नाही तेव्हा लोक डोक्यावर घागर घेऊन पाणी मागत असतात.

धोंड्या म्हणजे देवाला पाऊस दे अशी विनवणी लोक करत असतात. शेवटी गावभर पाणी मागून झाले की एके ठिकाणी थांबून घागर ठेवली जाते, आणि सगळे गावकरी त्या घागरीभोवती गोळा होतात. आणि घागरीला हलकासा हात लावतात. जर घागर फिरली तर देवाने आपले गाऱ्हाणे ऐकले असून लवकरच पाऊस पाडणार असा संदेश देवाने आपल्याला दिला असे समजले जाते. तर घागर फिरली नाहीतर देवाला आपला राग आला असून अजून काही दिवस आपल्याला पावसाची वाट पाहावी लागेल हे गृहीत धरले जाते.

देव गर्जत असतो, विजा चमकत असतात, पण पाऊस काय येत नाही.  अशावेळी कानबाई मातेला या गाण्यातून हाक घातली आहे. लवकर पाणी पाड म्हणजे आम्ही शेतात जायला आणि पेरणी करायला मोकळे होऊ अशी  कानबाई मायला विनवणी केलेली आहे. 

याशिवाय हिरवा डोंगर, पाणी उना अशी अनेक खान्देशी लोकगीते प्रसिद्ध आहेत. खान्देशी जनजीवनात पावसाळी गाण्यांना खूप महत्व आहे. त्यात अगदी प्रेमगीतापासून ते देवाला साद घालणाऱ्या अशा सगळ्या प्रकारच्या पावसाळी लोकगीतांची इथे रेलचेल आहे.

लेखक : वैभवराजे पाटील.

आणखी वाचा :

पावसाची गाणी : लता दीदींच्या आवाजातील सदाबहार पावसाचे गाणे 'ओ सजना' !!

हा आहे खानदेशचा गली बॉय....या ८ वर्षांच्या मुलाने खानदेशला वेड लावलंय राव...