कोरोना काळात माणुसकी हा सर्वात मोठा धर्म आहे हे वारंवार जाणवत आहे. कोरोना योद्धे तर करत असलेले बहुमूल्य योगदान कोणीही विसरु शकत नाही. पण यात सामान्य माणूस मग तो कुठल्याही वयाचा असो तोही मागे राहिला नाही. भारतात सध्या रक्तदानासाठी, प्लाझ्मा दानासाठी अनेकजण पुढे येत आहेत. पण याच काळात कोरोनाचा अभ्यास करण्यासाठी देहदान करून पाहिली भारतीय महिला ठरलेल्या ज्योत्स्ना बोस यांच्याविषयी तुम्हाला माहिती आहे का?
कोलकाता येथील ९३वर्षांच्या कामगार चळवळ नेत्या ज्योत्स्ना बोस यांनी कोरोनाच्या अभ्यासासाठी देहदान केले आहे. असे करणाऱ्या त्या भारतातील पहिल्या महिला ठरल्या आहेत. मानवावर कोरोनव्हायरसचे कसे परिणाम होतात यावरील संशोधनासाठी त्यांचे शरीर उपयोगी येणार आहे.
