चड्डी - अंडरवेअर, कच्छा अशा वेगवेगळ्या नावांनी ओळखल्या जाणार्या या अंतर्वस्त्राबद्दल कोणी फारसं चर्चा करताना दिसणार नाही. अमुकतमुक ब्लेझर घेतला तर सोशल मिडीयावर चमकणारी मंडळी 'आज मी एक भारीपैकी चड्डी घेतली' असं अपडेट टाकताना दिसणार नाहीत. थोडक्यात काय तर अत्यंत गरजेची पण अत्यंत दुर्लक्षित अशी ही वस्तू आहे, याबद्दल तुम्ही सहमत असाल यात शंकाच नाही. पण मग आजचा हा लेख या विषयावर का आहे ते आता समजून घ्या.
आधी शेअरबाजारात 'पेज इंडस्ट्रीज' नावाच्या समभागाची आजची किंमत बघा. या समभागाची मूळ किंमत आहे फक्त रुपये १०!!! थोडा खोल तपास केला तर लक्षात येईल की पेज इंडस्ट्रीचे ५०० समभाग तुम्ही २००८ साली घेतले असते तर तुमची गुंतवणूक फक्त १,७५,००० झाली असती आणि आजच्या तारखेस विकले तर हातात तब्बल दिड कोटी असते.
