या कुत्र्याचं नाव आहे ‘पेप दि ब्लॅक’. त्याला एका खुनाच्या प्रकरणात तुरुंगात टाकण्यात आलं होतं. त्याने एका मांजरीचा खून केला होता. हा पोरकटपणा वाटत असला तरी या कथेला एक वेगळी बाजू पण आहे.
कथेला सुरुवात होते १९२० साली. फिलाडेल्फियाच्या ‘इस्टर्न स्टेट पॅनटेन्शरी’ या तुरुंगाभोवती ही कथा फिरते. कैद्यांच्या सुधारणेसाठी आणि त्यांच्या पुनर्वसनासाठी बांधलेल्या सुरुवातीच्या मोजक्या तुरुंगापैकी हा एक तुरुंग होता. त्याकाळी जुन्या परंपरेप्रमाणे कैद्यांना शिक्षा म्हणून सक्तीच्या मजुरीच्या कामाला जुंपलं जायचं.
पेनसिल्व्हेनियाचे गव्हर्नर गिफर्ड पिंचॉट यांना या पद्धतीत सुधारणा आणायची होती. त्यांना विश्वास होता की कैद्यांना सुधारता येऊ शकतं आणि त्यांना पुन्हा एकदा मुख्यप्रवाहात आणता येऊ शकतं.
