व्हॅक्सीनच्या ट्रायलमध्ये भाग घेतलेल्या डॉ. मिलिंद पदकी यांचे अनुभव त्यांच्याच शब्दात वाचा !!

३० /११/२०२०

व्हॅक्सिन घेण्यासाठी न्यूयॉर्कच्या हॉस्पिटलमध्ये निघालो आहे. 'प्लासिबो' सलाईनचा असणार आहे. तो मिळाल्यास ताप, वेदना, हुडहुडी वगैरे काहीच न झाल्यामुळे, तो दिला गेला आहे का हे उद्यापर्यंत समजेलच. बाकी 'अनुभवा'ची पुढची पोस्ट सात तासांनी.

- Covid-19 व्हॅक्सिन घेऊन आलो.  पाण्यासारखे इंजेक्शन, अर्धा मिलिलिटर व्हॉल्युम, इन्ट्रामस्क्युलर*. घेताना बारीकसे दुखले. 

- वीस एक मिनिटे इंजेक्शनच्या जागी दुखले. 

- आता तीन तास झाले, कोणताही त्रास नाही. 

- झालाच तर 'खरा' त्रास (ताप, हुडहुडी) १२ तासात होईल असे तिथले लोक म्हणाले. 

- THEY will pay me a total of $600/-. Got $ 100/- today.

- आधी पूर्ण मेडिकल हिस्ट्री, मग मेडिकल चेकअप झाला. Also nasal swab and blood sample.

- १, २ आठवड्यांनी फोनवर फॉलोअप. 

- ४ आठवड्यांनी दुसरा डोस.

-मग २,३, ६ महिने आणि १,२ वर्षांनी फॉलोअप. 

- वरच्या दोन गोऱ्या डॉक्टर बायका सोडल्यास सर्व स्टाफ आशियाई (मुख्यतः भारतीय) होता. 
बाकी क्रमशः

६ तासांनंतर

व्हॅक्सिन घेऊन आता सहा तास झाले. शरीराच्या तापमानात फरक नाही. आधी ९७. ४ सें होते, आता ९७. ५ आहे. थोडी मरगळ जाणवते आहे.

त्यानंतर १ तासाने

आता झोपतो. मला फ्लू व्हॅक्सिनने तरी ताप येत नाही,  कदाचित यानेही येणार नाही. त्यामुळे ताप हे लक्षण, व्हॅक्सिन का प्लासिबो हे ओळखण्यासाठी वापरणे चुकीचेही असू शकेल. सकाळी लेटेस्ट अपडेट देईनच.

त्या रात्रीचा अनुभव:

- कोव्हीड व्हॅक्सिन घेऊन १४ तास होऊन गेले. रात्र सरली. 

- रात्र अस्वस्थ गेली. झोप लागली नाही. इंजेक्शनच्या जागी बारीक वेदना आहे. ताप असल्याची "भावना" आहे, पण तो थर्मामीटरवर  दिसत नाही. मनाचे खेळ असू शकतात. मरगळ खूप आहे. 

- ट्रायल डिझाईनप्रमाणे मला दिलेला प्लासिबो असण्याची शक्यता ३३ टक्के आहेच. हे कोडे अजून सुटलेले नाही. 

- व्हॅक्सिन संदर्भात भारतात एका कंपनीवर कोट्यवधी रुपयांचे खटले वगैरे चालू असल्याचे ऐकतो. माझे हे मांडणे भलत्याच जागी 'कोट' वगैरे होण्याच्या भानगडीत मला पडायचे नाही. त्यामुळे मी  कोणत्या कंपनीचे व्हॅक्सिन घेतले आहे हे मी सांगू शकत नाही. पण माझ्या या पोस्ट्स,  भारतातल्या सत्य-शोधकांना  रेलेव्हंट आहेत हे नक्की. 

- क्रमशः

२४ तासांनंतर..

कोव्हीड व्हॅक्सिन घेऊन २४ तास झाले. प्रकृती आता पूर्णपणे सुधारली आहे. थकलेपणा गेला आहे. इंजेक्शनच्या जागी वेदना नाहीत. ताप नाही.

व्हॅक्सिन कुणाला "आधी" मिळावे याबाबतचे अमेरिकेतले अधिकृत विचार पाहिले तर सुमारे १५ कोटी लोक माझ्या आधी येतात. वयस्क, आरोग्य कर्मचारी, अत्यावश्यक सेवा, सैन्य, रोग्यांचे नातेवाईक इ. इ. गटांतल्या लोकांना प्राधान्य असावे. त्यामुळे सध्या मला मिळालेले व्हॅक्सिन प्लासिबो* नसावे अशी प्रार्थना करीत आहे.

तळटीप:

इन्ट्रामस्क्युलर: स्नायूत दिले जाणारे औषध. सहसा इंजेक्शन ही शिरेतून दिली जातात, पण इन्सुलिनसारखी काही औषधे स्नायूत दिली जातात.

प्लासिबो: औषध म्हणून दिले जाणारे न-औषध. कधीकधी लोक औषधापेक्षा औषध घेतले आहे या भावनेने बरे होतात. अशी शक्यता पडताळून पाह्यण्यासाठी दिले जाणारे औषध प्लासीबो म्हणून ओळखले जाते.