पावसाळ्याच्या दिवसात काय असावं घरातल्या औषधपेटीत !!

औषधांचा कमीतकमी १ आठवड्याचा आगाऊ साठा तयार ठेवा. वृध्द माणसे पावसात बाहेर जाऊन औषधे आणण्याचे टाळतात.  वृध्दांची मेडिकल हिस्टरी लक्षात घेऊन काही आणखी तयारी करावी. उदाहरणार्थ, अस्थमा रुग्णांचा दमा या दरम्यान कधीही उफाळून येऊ शकतो. अशावेळी अस्थमा पंप हाताशी असलेला सोयीचा पडतो. 

घरी लहान बाळ असेल तर ताप, सर्दी, खोकला यावरची त्यांच्या डॉक्टरांनी दिलेली औषधे वेगळी आणून ठेवा. उदाहरणार्थ, मोठ्या माणसांचे आणि बाळाचे तापाचे औषध जरी एकसारखेच असले तरी लहान बाळाला देण्याचे डोस वेगळे असतात. त्यांना बहुतेक औषधे लिक्वीड ड्रॉप्सच्या स्वरुपात दिली जातात. झालंच तर रांगणार्‍या बाळाच्या घरात लाद्या जंतूनाशकाने दिवसातून कमीतकमी दोनदा पुसुन घ्याव्यात.

या काळात पोट बिघडणे, उलट्या होणे, अतिसार (हगवण ) असे त्रास बहुतेकांना होतात. Domstal, Avomine or Perinorm  यांसारखी औषधे आणून ठेवा..Perinorm  ची अ‍ॅलर्जी असेल तर पर्यायी औषध विचारून घ्या. अतिसारामुळे थकवा येतो. शरीरातील सोडीयम पोटॅशियम या क्षारांचे प्रमाण कमी होते म्हणून इलेक्ट्रालची चार पाकीटे घरात  हवीच. याखेरीज गॅसचा त्रास असेल तर इनोचे चार पाच पाउच असलेले बरे !

सतत पावासात फिरल्यावर पायाच्या बोटांच्या मध्ये चिखल्या वगैरे होतात, अशा वेळी त्यासाठी एखादे मलम आणून ठेवावे. पाय घसरून पडणे, खरचटणे, असे प्रसंग कधीतरी उदभवू शकतात. डेटॉल -सॅवलॉन यासारख्या जखमा स्वच्छ करणार्‍या जंतूनाशकांची एखादी छोटी बाटली कामास येते. बिटाडाइन, सिल्व्हरेक्स, निओस्पोरीन, सोफ्रामायसीन अशी मलमे  आपल्या पेटीत अत्यंत आवश्यक आहेत. या खेरीज एक छोटे बँडेज, स्ट्रेच बँडेज ऐन वेळी कामास येते.