या पठ्ठ्याने भारतीय पदार्थांच्या जोरावर मास्टरशेफ ऑस्ट्रेलियाचे विजेतेपद मिळवले आहे...कोण आहे जस्टीन नारायण?

टॉप तीन मध्ये किश्वर चौधरी, पीट कॅम्पबेल आणि जस्टीन नारायण हे तिघेजण होते. किश्वर ही बांगलादेशची आहे, तर पीट कॅम्पबेल हा ऑस्ट्रेलियाच्या न्यू साउथ वेल्सचा आहे. या दोघांनीही जस्टीनला जोरदार टक्कर दिली. पण जस्टीनचे खाद्यपदार्था अव्वल निघाले. त्यामुळे जस्टीन यशस्वी झाला. 

जस्टीन हा फिजी आणि भारतीय अशा दोन्ही वंशाशी निगडीत आहे. त्यामुळे त्याला दोन्ही खाद्यसंस्कृती परिचयाच्या आहेत. जस्टीनने वयाच्या १३व्या वर्षीच स्वयंपाक सुरू केला. फिजी आणि भारतीय पाककृतीची चव त्यांच्या स्वयंपाकात दिसून येते. मास्टर शेफ ऑस्ट्रेलियाचे विजेतेपद जिंकल्यानंतर जस्टीन म्हणाला की, 'त्याची आई ही त्याची सर्वात मोठी प्रेरणा आहे. माझ्या मते ती उत्तम खाद्यपदार्थ बनवते.' जस्टीन नारायणला भारतीय पदार्थ जास्त जवळचे वाटतात. म्हणून त्याने शोमध्ये बनवलेले खास इंडियन चिकन टाकोस, चारकोल चिकन, फ्लॅटब्रेड, लोणचे, कोशिंबीर, भारतीय चिकन करी हे पदार्थ जजेसवर छाप पाडण्यात यशस्वी झाले.

जस्टीनचे स्वप्न आहे की नवीन भारतीय रेस्टॉरंट उघडायचे आणि भारतीय पदार्थ ऑस्ट्रेलियात बनवायचे. सध्या तो ऑस्ट्रेलियात एका रेस्टॉरंटमध्ये सहाय्यक म्हणून काम पाहतो.

२०१७ला जेव्हा तो भारतात आला तेव्हा तो इथल्या पदार्थांचा चाहताच झाला. इथले मसाले, इथल्या वेगवेगळ्या चवी त्याने समजून घेतल्या. याचा उपयोग त्याला शोमध्ये वेगवेगळ्या फेऱ्यांमध्ये झाला. त्याला भारतीय वंचित मुलांच्या शिक्षणासाठी बरेच काम करायचे आहे. त्यासाठी संस्थांशी तो जोडला गेला आहे.

मास्टरशेफ ऑस्ट्रेलिया शो जिंकल्यानंतर जस्टीन खूप आनंदात आहे. तो म्हणतो मला सध्या पार्टी करायची आहे. हा शो एक जबरदस्त अनुभव होता आणि त्यातून मला खूप काही शिकायला मिळाले. या विजयाचा आनंद मी घेणार आहे.

भारतीय पदार्थ जसे भारतात लोकप्रिय आहेत तसेच परदेशातही ते खूप आवडीने खाल्ले जातात. जस्टीन नारायण भारतीय पदार्थांना एक जागतिक ओळख देण्यास उत्सुक आहे. त्याला पुढच्या वाटचालीसाठी खूप शुभेच्छा.

लेखिका: शीतल दरंदळे