मंडळी, कालच व्ही जी सिद्धार्थ यांच्या आत्महत्येची बातमी आली. कर्जापायी त्यांनी आपला जीव दिला. आज आम्ही तुम्हाला जी गोष्ट सांगणार आहोत ती गोष्ट पण आत्महत्येच्या संदर्भात आहे, पण या गोष्टीला हॅपी एंड मिळालाय.
बी. मुरुगन नावाचा एक तरुण बसने प्रवास करत होता. त्याने ठरवलं होतं की ही बस आपल्याला जिथे सोडेल तिथे जाऊन आपण आत्महत्या करायची. बसने त्याला कोईमतुरच्या सिरमुगई येथे सोडलं. ह्यावेळी त्याला हे माहित नव्हतं की इथून पुढे आपलं आयुष्य बदलणार आहे. आपण ठरवतो एक आणि होतं दुसरंच, असंच त्याच्या सोबत घडलं. तो रात्रीच्या २ वाजता एका फुटपाथवर बसला होता. त्यावेळी तिथे एक चप्पल दुरुस्त करणारा माणूस आला आणि त्याने मुरुगनला फुटपाथवर झोपायला जागा दिली. एवढंच नाही तर पांघरायला गोधडी पण दिली. त्यावेळी मुरुगनने आजूबाजूला पाहिलं. त्याच्यासारखेच अनेक बेघर लोक त्याच्या आजूबाजूला झोपले होते.
